ನನ್ನ ಕನ್ನಡದ ಅಂತರಂಗ
ನನ್ನ ಕನ್ನಡ ಅಕ್ಷರಗಳ ಗುಂಪಲ್ಲ
ಕಾಲದ ಹಣೆಯಲ್ಲಿ ಮೂಡಿದ ಶಾಸನ!
ನನ್ನ ಕನ್ನಡ ನುಡಿಗಳ ಸಾಲುಗಳಲ್ಲ
ತಲೆಮಾರುಗಳ ಉಸಿರಿನ ಸ್ಪಂದನ!
ನನ್ನ ಕನ್ನಡ ಭೂಪಟದ ಗೆರೆಗಳಲ್ಲ
ಸಂಸ್ಕೃತಿಯ ಬೇರುಗಳ ವಿಸ್ತಾರ!
ನನ್ನ ಕನ್ನಡ ಮಣ್ಣಿನ ಕಣವಲ್ಲ
ಇತಿಹಾಸ ಹೊತ್ತ ಜೀವಂತ ನೆನಪು!
ನನ್ನ ಕನ್ನಡ ಕೇವಲ ಭಾಷೆಯಲ್ಲ
ಭಾವಗಳ ಸವಿಮೌನ ಅನುವಾದ!
ನನ್ನ ಕನ್ನಡ ಗತಕಾಲದ ಉಳಿಕೆಯಲ್ಲ
ಭವಿಷ್ಯದ ಕನಸುಗಳ ಅಡಿಪಾಯ!
ನನ್ನ ಕನ್ನಡ ಕವಿಗಳ ಕಲ್ಪನೆಯಲ್ಲ
ಜನಜೀವನದ ವಾಸ್ತವದ ಪ್ರತಿಬಿಂಬ!
ನನ್ನ ಕನ್ನಡ ಹಬ್ಬದ ಸಂಭ್ರಮವಲ್ಲ
ನಿತ್ಯ ಬದುಕಿನ ನೀತಿಯ ಸಂಕಥನ!
ನನ್ನ ಕನ್ನಡ ಅಭಿಮಾನದ ಸಂಕೇತವಲ್ಲ
ನಮ್ಮ ಅಸ್ತಿತ್ವದ ಅಂತರಂಗದ ಸಹಿ!
ನನ್ನ ಕನ್ನಡ ಕೇವಲ ಹಾಡಿನ ರಾಗವಲ್ಲ
ನೆಲದ ಎದೆಯ ನಾದಬ್ರಹ್ಮ!
ನನ್ನ ಕನ್ನಡ ನದಿಗಳ ಪ್ರವಾಹವಲ್ಲ
ನಾಗರಿಕತೆಯ ನಿರಂತರ ಚಲನೆ!
ನನ್ನ ಕನ್ನಡ ಬರಿಯ ಪರಂಪರೆಯಲ್ಲ
ಹೊಸತನದತ್ತ ಸಾಗುವ ಪಯಣ!
ಕನ್ನಡ ಕೇವಲ ಒಂದು ಗುರುತಲ್ಲ
ವಿಶ್ವದೊಳಗಿನ ನಮ್ಮ ಶಾಶ್ವತ ಅಸ್ಮಿತೆ!
ನನ್ನ ಕನ್ನಡ ಮುಗಿದ ಕಥೆಯಲ್ಲ
ಕಾಲ ಬರೆಯುತ್ತಿರುವ ಮಹಾಕಾವ್ಯ!
-ಟಿ.ಪಿ.ಉಮೇಶ್, ಹೊಳಲ್ಕೆರೆ