ತಾಯಿ
ಮನೆಯಲ್ಲಿ ಮಗುವಿರಲು ಸಂತಸವು ತುಂಬಿರಲು
ದಿನವುರುಳಿ ನಗುನಗುತ ಚಿಂತೆಮರೆತು
ಮನದಲ್ಲಿ ಉಲ್ಲಾಸ ಮಗುವಿನಾ ತುಂಟಾಟ
ಮನೆಯಲ್ಲ ಕಳೆಹೊಂದಿ-ಧರಣಿದೇವಿ||
ಮಗುವನ್ನು ನೋಡುತಲಿ ಮಮತೆಯನು ತೋರುತಲಿ
ಸೊಗಸಾದ ಅನುಭವವ ತಾಯಿಪಡೆದು
ಮಿಗಿಲಿಲ್ಲ ಕಂದನಿಗೆ ಪ್ರಪಂಚ ನೀನೆನುತ
ಮುಗಿಲನ್ನೆಮುಟ್ಟಿರಲುಧರಣಿದೇವಿ||
ತಾಯ್ತನದ ಸುಖವದುವೆ ಹೆಣ್ಣಿನಲಿ ಮನೆಮಾಡಿ
ಕಾಯಕದಿ ಮೈಮರೆತು ದಿನಪೂರವು
ಕಾಯುವಳು ಕಂದನನು ಮಡಿಲಲ್ಲಿ ಪೋಷಿಸುತ
ನೋಯುತಲಿ ಬೇಯುತಲಿ-ಧರಣಿದೇವಿ||
ಮಗುವಿನಾ ಪಾಲನೆಗೆ ತನ್ನನ್ನೆ ಮುಡುಪಿಟ್ಟು
ಸಿಗುತಿರುವ ಸಣ್ಣಖುಷಿ ಮನಸಿನಿಂದ
ಬಿಗಿದಪ್ಪಿ ಒಳಗೊಳಗೆ ದು:ಖವನು ತಾನಂಗಿ
ಮಗುವನ್ನು ಮುದ್ದಿಸಲು-ಧರಣಿದೇವಿ||
ಬೆಳೆಸುತಲಿ ತಿಳಿಸುತಲಿ ಜಗದಲ್ಲಿ ಬಾಳುವುದ
ಕಲಿಸುತಲಿ ಬಳಿಯಿರಲು ಸಹಕರಿಸುತ
ಸಲಹೆಗಳ ನೀಡುತಲಿ ಬೇಕಾದ ಸಮಯದಲಿ
ನಲಿಯುತಲಿ ಸಂತಸದಿ ಧರಣಿದೇವಿ||
-ಧರಣೀಪ್ರಿಯೆ, ದಾವಣಗೆರೆ
*****