ಅನುದಿನ ಕವನ-೧೫೪೮, ಹಿರಿಯ ಕವಿ: ಸಿದ್ಧಲಿಂಗಪ್ಪ ಬೀಳಗಿ, ಹುನಗುಂದ, ಕಾವ್ಯ ಪ್ರಕಾರ: ತನಗಗಳು

ತನಗಗಳು

೧
ಯುಗಾದಿಯ ಹಬ್ಬಕೆ
ಹೊಸತು ಸಂವತ್ಸರ
ಮರೆಯೋಣ ನಾವೆಲ್ಲ
ಹಿಂದಿನೆಲ್ಲ ಮತ್ಸರ
೨
ವಸಂತಾಗಮನಕೆ
ಹೊಂಗೆ ಹೂವಿನ ಘಮ
ದುಂಬಿಗಳ ದಾಂಗುಡಿ
ಸಂಗೀತದ ಸಂಭ್ರಮ
೩
ಸುಖ ದುಃಖಗಳವು
ಬೇವು ಬೆಲ್ಲಗಳಂತೆ
ಯುಗಾದಿ ನೆಪದಲಿ
ಬಿಡೋಣ ಎಲ್ಲ ಚಿಂತೆ
೪
ಬೋಳಾದ ಮರತುಂಬ
ಚಿಗುರಿನ ತೋರಣ
ಮೊಗ್ಗು ಹೂವಿನ ಮಧ್ಯೆ
ಮಿಡಿಕಾಯಿ ಕಂಕಣ
೫
ಒಣಗಿದ ಮರದಿ
ಹಸಿರಿನ ಹಂದರ
ಶಿಶಿರದ ಮೌನಕೆ
ವಸಂತದ ಉತ್ತರ
೬
ಸಿಹಿ ಕಹಿಗಳವು
ಬದುಕಿನ ಹೂರಣ
ಸಂತಸ ಬದುಕಿಗೆ
ಸಮಚಿತ್ತ ಕಾರಣ


-ಸಿದ್ದಲಿಂಗಪ್ಪ ಬೀಳಗಿ.ಹುನಗುಂದ

Leave a Reply

Your email address will not be published. Required fields are marked *