ಗಜಲ್
–
ಒಲವಿನ ಓಲೆಗಳೆಲ್ಲ ಗರಿಬಿಚ್ಚಿ ನರ್ತಿಸುತಿವೆ ಬರಬಾರದೆ ಗೆಳತಿ
ಮೈಮನದ ಸುಳಿಗಳೆಲ್ಲ ವೀಣೆಯಾಗಿ ಹಾಡುತಿವೆ ಬರಬಾರದೆ ಗೆಳತಿ
–
ನಿನ್ನ ಕಣ್ಣ ಕಂಬನಿಯಗುಂಟ ನನ್ನೊಲವು ಜಾರಿ ಹೋದರೇನಾಯ್ತು
ಕಣ್ಣ ಪ್ರತಿ ಹನಿಗಳೂ ಪ್ರೇಮಗೀತೆಯ ಹಾಡುತಿವೆ ಬರಬಾರದೆ ಗೆಳತಿ
–
ಖಾಲಿಯಾದ ಜಾಮುಗಳೆಲ್ಲ ಸಾಕು ಒಡೆಯ ಎಂದು ಗೋಳಿಟ್ಟರೇನಾಯ್ತು
ನಿನ್ನ ನೆನಪಿನ ಮತ್ತಿನಲ್ಲೇ ಮನವು ತೂರಾಡುತಿದೆ ಬರಬಾರದೆ ಗೆಳತಿ
–
ಚುಕ್ಕಿ ಚಂದ್ರಮ ಹಸಿರು ಹೊಗರು ಕೊಸರುಗಳೆಲ್ಲ ಸವಕಲಾದರೇನಾಯ್ತು
ಪ್ರತಿ ಕ್ಷಣವೂ ನೆನಪಿನಿಂದ ಅವುಗಳ ಚೆಲವು ಹೊಸತಾಯ್ತು ಬರಬಾರದೆ ಗೆಳತಿ
–
ಜಗವೆಲ್ಲ ಇವನಿಗೆ ಒಲವಿನ ಹುಚ್ಚೆಂದು ಕೂಗಾಡಿದರೇನಾಯ್ತು
ಸಿದ್ಧನ ಪ್ರೀತಿ ಮಾಗಿದುದು ಅವರಿಗೇ ತಿಳಿಯದಾಯಿತು ಬರಬಾರದೆ ಗೆಳತಿ
–
-ಸಿದ್ಧರಾಮ ಕೂಡ್ಲಿಗಿ
*****
