ಅವಳು ಅವಳ ಹಾಗೆ…
ಇತಿಹಾಸ ಮರುಕಳಿಸುತ್ತದೆ
ಮತ್ತೆ ಮತ್ತೆ.
ಪುನರಾವರ್ತನೆ ಕುರೂಪಿ, ಮಾಡಿದ್ದನ್ನೇ
ಮತ್ತೆ ಮತ್ತೆ ಮಾಡುವುದು
ಇನ್ನೂ ಕುರೂಪಿ.
ಮರದಲ್ಲಿವೆ ಸಹಸ್ರಾರು
ಎಲೆ ಎಲೆ
ಒಂದು ಇನ್ನೊಂದರಂತಿಲ್ಲ ಒಂದೊಂದೂ
ಬೇರೆ ಬೇರೆ, ಎಷ್ಟೊಂದು
ಹಸಿರು- ಗಿಣಿ ಹಸಿರು,
ಪಾಚಿ ಹಸಿರು, ಹೀಗೆ.
ಗುಲಾಬಿಯಲ್ಲಿನ
ಒಂದೊಂದು ಹೂ ಬೇರೆ ಬೇರೆ, ಒಂದೇ
ಮರದ ಒಂದೊಂದು ಮಾವಿನ
ಹಣ್ಣಿನ ರುಚಿಯೂ ಬೇರೆ
ಪ್ರಕೃತಿ ಮಹಾಕವಯತ್ರಿ
ಸೃಜನಶೀಲೆ
ಸೃಷ್ಟಿಸುತ್ತಾಳೆ ಸದಾ ಹೊಸತನ್ನು, ಅನನ್ಯ-
ವಾದದ್ದನ್ನು. ಪುನರಾವರ್ತನೆ-
ಯ ಮಾತು ಅವಳಲ್ಲಿಲ್ಲ
ಅವಳ ಹಾಗೆ ಅವಳು
ಮಾತ್ರ…
-ಎಂ ಎಸ್. ರುದ್ರೇಶ್ವರಸ್ವಾಮಿ, ಬೆಂಗಳೂರು